100 Joor BMG - am 2. Juni 2007 in dr Barfiesserkirche
Doo steen si jetz, die traditioonsbewusste Heere, wo mer fir rundi hundert Joor hit deerfen eere. Will kaine me derbyy isch vo den alte Grinder-Knaabe hämmer in Ürer alte Chronik miesse graabe. Si hänn sich bi dr Grindig Nyyzäähundertsiibe als ainzigi beraits am Zyschtig ummedriibe. Worum si sich denn Mittwuch-Gsellschaft Basel gnennt hänn isch woorschyynts, will si sich emol verpennt hänn, Und siiderhäär leen si sich ganz no Bruuch und Sitte am Mittwuch und am Mäntig uff e Cortäge bitte. Und wie! Si deerfe sich mit Üre Sujets zaige. Bi iire Glyggekinschtler findsch e ganz e Raige vo Baasler Maischter, alles numme hooch vereerti wie Sulzbi, Hindelang und Afflerbach (dr Feerdi). D Dammbuure hänn bi iine immer seer vyl golte. Und d Pfyffer? Friener het s Versterggig bruucht vo Olte! Die schwaarzi Episoode wämmer jetz vergässe. Si deerfe sich scho lengschtens mit de Beschte mässe. Noch guetem Glyggebruuch hänn si sich au no gspalte. S het d Bebbi gää, und die vom Laiezoorn, die Alte. Doch immer hänn si wider gligglig kenne lande und sinn - wie me si kennt - im Stänzler aanegstande, au iber s Joor zer folkloristische Verzierig im Eisass, z Gänf, bi jeedem Fescht mit dr Regierig. Au z Minche geen si jetz go ruesse und go bloose, als Baasler Bajuwaare in de Lääderhoose. Und dääwääg hänn si sicher au no glyy in petto en Export-Engagement in Rom bim Benedetto. Si wissen aber ainewääg no: s ainzig wichtig sinn gueti Sujets, Lambbe, Ruesse, Pfyffe, Dichtig. Und doorum simmer danggbaar stolz uff d BMG.
Mer grateliere häärzlig!
s Fasnachts-Comité
