100 Joor BMG - am Drummeli 2007
Scho hundert Johr gits d BMG. Dasch drei Johr meh als s Comité! Zwai Wältgrieg hänn Europa prägt. Ihr hänn au denn e Fasnacht pfläggt, mit Witz, Humor und Zämmeheebe. So iberstoht me jeedes Beebe!
Ihr sinn bigoscht e stramme Huuffe, diend Schwyzer - und au Wyssbier suuffe! In Minchen am Oktoberfescht gänn ihr als Wärbedrääger s Bescht! Ihr mached Ydrugg, ganz enorme Mit eire Stänzler-Uniforme! Mänggs Dirndl draumt, wenn s eich duet gseh: Aifach männlig! BMG!
Die Stänzler hänn e lang Kapitel, und drum au Schaabe in de Kittel! Do maint dr Fonds de Lotterie: Jetz muess e Ney-Aaschaffig sy! Ihr hänn e Hampfie Gluubis gfasst, ass jede Kittel wider basst!
E mängge ka s als kuum erwarte, bis ihr am Laiezorn dien starte. Ihr hänn no immer Ross derby. Ains deerf sogar e Mitglied sy! Und hindedraa, vo wytem z gseh: D Lambbe vo dr BMG! Eiri Sujets sinn Gedicht und gehn y in d Fasnachtsgschicht!
Dr Fasnachtszyschtig isch vo alle dr Daag, wo eich speziell duet gfalle! Är wird ganz bsunders zelebriert, so dass s aim tschuuderet und friert, so kaibe nooch bim Mummeschanz isch allewyl dr Dootedanz!
Mir wintschen Eich jetz numme s Bescht zue eierem Johrhundert-Fescht! Und fraien is, au wenn mer friere, wenn ihr an uns verby marschiere! Mer lipfe gärn fir eich dr Huet. Ihr dien unserer Fasnacht guet! Es gratuliert dr BMG härzlig s Fasnachts-Comité
Basel, am 16. Hoornig 2007
