Jubiläum 100 Jahre BMG, Samstag, 2. Juni 2007, Ansprache des Präsidenten Dominique Mollet
Wie s im Feschtprogramm scho stoht
Begriess ych dr Regierigsrot
Und au no s Fasnachts-Comité
Ihr wärdet baidi do no gseh
Willkomme all Ihr Jubelgescht
Zue unsrem Jubileumsfescht
Mit Rede – toll rhetorische
Mit Jubilar – euphorische
Im Rahme – däm historische
Mit Baugrischt – provisorische
Am 100 Johrfescht simmer zwäg
S isch ain vo unsre Jubeldäg
Wenn do in – d Ladärne brenne
Drum wänn mir uns im Innere
jetzt au an die erinnere
wo nie meh Fasnacht mache kenne
Gäb s d Fasnacht ohni d BMG?
D Clique, s Fasnachts-Comité?
S wär wiene Delphin in dr Steppe
Oder s Baudep ohni Deppe
Wie s Angie Merkel mit Frisur
Und d Queen Mum mit Tonic pur
Wie dr Sämi Schmid mit Biss
Und dr Bering ohni Bschiss
Wie S Calmy-Rey als Musigstar
Dr Landis, dopt mit Isostar
Dr George W. Bush, wo Fride stiftet
Dr Berlusconi, gar nit gliftet
Dr Herzog ohni de Meuron
Der Sarko ohni Grand Nation
Wie Basler wo in Allschwil schiesse
Und Bayern wo ne Ex-Bier gniesse
Dr Vosseler, wenn s Wolke het
Dr Benedikt im Ehebett
Dr Putin ohni KGB
Und s Yakins ohni FCB
Wie Heli-Skiing uff em Gämpe
E Fraueclique ohni Lämpe
Was macht denn d BMG so toll
So männlig, stargg und wundervoll
Aifach viril - so gaischtig mobil
Diskret wie s Konzil, so alt wie dr Nil
So schampar agil – iberhaupt nit debil
Mänggmol skurril, und immer am Zyl
Hämmer d Fasnacht ächt erfunde?
Die ganze zwaiesibzig Stunde?
Dr Fasnachtszyschdig das isch klar
Gits dangg uns – em Jubilar
Und unsri Hieroglyphe-Note
Sin ys doch au zimlig grote
Und zuedäm gits ys drey Johr meh
Als unser Fasnachts-Comité
Mir hän Runzle, frisch und stramm
Die sin fascht jinger als dr Stamm
Mir hänn no Resser und e Wage
Und lehn d Ladärne sälber trage
Und d Stänzler die sin legendär
Als s friehner Basler Milidär
Die hänn zwor dertsmol fascht nur gsoffe
Und hätte kum e Find je droffe
Mir gän ys Mieh das Erb z erhalte
Und d Stänzlerufftritt ähnlig z gstalte
Vor allem aber – und das isch genial
D Alice Schwarzer wird zwor ganz fahl
D Anita Fetz die findet s fatal
Und d Eva Herzog schlicht e Skandal
Dr Thomas Kessler - s isch katastrophal
Dr -minu dä sait – das isch doch banal
Und drifft im versteggte grad scho sy Wahl
Mir hän fascht en Art e hailige Gral
Alles nur Männer dasch phänomenal
E Proscht uff unsri Männerclique
Sin doch das die bsunders schicke
Au gmischti Clique sin famos
Doch gheere die halt nit uff d Stross
Hundert Johr männlig – mr riefe Juhee
Hundert Johr gits d BMG
Mr dangge Eych, ihr Jubelgescht
In hundert Johr, bim näggschte Fescht
Dominique Mollet
