E juhubelfeschtlige Dangg
Y dangg allne Betailigte fir ihre grosse Ysatz. Ihr hänn e sensationell guete Job gmacht! Y dangg
de Stänzler am Ygang vo der Barfiesserkirche (wenn kemmet er ändlig in e rächti Fasnachtsgsellschaft?)
em Catering fir numme sälte lääri Gleeser
unserem Presidänt fir e Aasproch mit Witz und Gaischt
em Carlo Conti, wo e Hunderternagel uff e Kopf droffe het. Komplimänt fir die Red!
em Felix RvR, wo s'Fasnachtscomité beschtens verdrätte het und e Prachtsschybe vom Fredy Prack mitbrocht het. E ganz e speziell härzlige Dangg dooderfir.
allne Gescht. De charmante guet ussehende Wyblige, de gaischtryche Männlige und au däne irgendwie derzwische...
der Knabemusig fir e feyne Umgang mit Stil und Taggt.
der BVB fir e Tatzelwurm, wo fascht nimm uffgheert het. Und nadyrlig fir die erscht vernimftigi Wärbig uff em Dach.
em Fritz und Däni Hirt, wo als HirteHünd (äxgysi) derfir gsorgt hänn, ass mer alli zämme im eo ipso aako sinn.
em ganze Team vom eo ipso fir d'Gaschtfrindschaft und d'Bewirtig (e liebe Gruess in Wykäller und d'Kuchi).
der Technik wo fir e stimmigsvolli Deko, fir d'Beschallig etc. usw. o.ä. ... gsorgt het.
Touche ma Bouche und Walo N., won ys massgschnyderet und sensationell guet dur der Oobe gfiert hänn.
de Twins, won ys zaigt hänn, ass me sich au harmonisch verrängge ka.
de BMGörls fir ihre unvergässligen Uffdritt. WoW... BMGörls - aifach männlig.
der Monique, wo iber unsere Köpf d'Schwärkraft uffghoobe und sich harmonisch glänggig am "Sail" aabegloh het.
de Buebe vo aLive fir ihre stimmgwaltige und stimmigsvolle Uffdritt. Und nadyrlig em Marco fir sy Gedicht...
em Duo Rainbow fir dezänti Hintergrundmusig und fir die richtige Rhythme zem Danze.
Der Frau Felix und em Herr Lehmann vo Katz Music Events, wo im Hintergrund gschafft, organisiert, verhandlet und koordiniert hänn wie die Wilde. Si hänn's mit uns nit allewyl aifach ka. Mir sinn halt au als Kund anderscht...
die baide junge Dame, wo Foteli gschosse hänn am laufende Band und
y dangg alle BMGler wo mit ihrem Ysatz derzue bydrait hänn, ass der geschtrig Daag esoo guet glunge isch. Härzlige Dangg fir alles.
E ganz e spezielle Dangg alle Frind und Kollege vo der Jubelcommission für's Verdraue und die guet Zämmenarbet.
Doch was wär e Fescht ohni Gescht? Eych allne e ganz e grosse Dangg, ass Er derby gsi sinn und e wunderbari Atmosphäre und Stimmig gschafft hänn. S'isch e Fraid. Y freu mi uff die näggschte hundert Johr mit Eych.
Hans
